「你睇咗成個鐘iPad啦！再睇會盲㗎！」 呢句對白係咪好熟？作為現代家長，我哋每日都要同電子產品「爭仔女」。但與其日日嗌交，不如善用 Parental Control（家長監護功能），等科技幫我哋做「衰人」！今次就同大家分享點樣設定 Apple TV、iPad 嘅使用時間，仲有我最鍾意嘅 「例外功能」，等小朋友做功課時都可以用指定app！
🕒 Part 1：預設 Apple TV 最長使用時間，夠鐘就斷WiFi！
小朋友成日煲 YouTube / Netflix / Disney+ 睇到唔願停，直到我發現 Apple TV 嘅「螢幕使用時間」功能，終於可以自動 cut 線！
📌 STEP BY STEP 教學：
- 打開「設定」 → 選擇「螢幕使用時間」
- 點「開啟螢幕使用時間」→ 選「這是我的[裝置]」（如果係小朋友用，選「這是我孩子的[裝置]」）
- 設定「停用時間」：例如 晚上10點到朝早7點，期間除咗通話同指定app，其他都用唔到
- 設定「App限制」：自訂每日娛樂app（如Netflix、YouTube）嘅使用時限，例如每日最多1小時
- 最正係可以 「鎖定限制」，冇密碼就改唔到設定！（溫馨提示：密碼千祈唔好俾小朋友知， 但一定要自己記得！）
💡 我set咗 「夠鐘自動暫停」 功能，小朋友冇得同我拗「等埋呢集！」因為系統會直接斷WiFi，無得嘈！
📱 Part 2：iPad App 限制功能，做功課都唔怕分心！
點樣確保小朋友真係「查資料」而唔係打機? 「個別App限制」 幫到你！
📌 STEP BY STEP 教學：
- 「設定」→「螢幕使用時間」→「App限制」
- 可以揀 「所有App」 設每日上限（例如1小時），或者 逐個App設定（例如YouTube每日30分鐘）
- 我最愛嘅「例外功能」！即使限制所有App，都可以 「豁免」 學習類app，例如：
- 「香港小學習字表」（查字典必備）
- 「Google Classroom」（交功課用）
- 設定完成後，夠鐘就會彈出 「時間到」 提示，冇得偷雞！
🎯 Part 3：最緊要教識自律！點樣同仔女「談判」Screen Time？
科技可以幫手，但最關鍵係要小朋友 學識自我管理。我嘅心得係：
✅ 1. 透明化數據
一齊睇番過去 Screen Time 用量，等佢知道自己嘅使用習慣同埋自己評估使用量。
✅ 2. 讓孩子自己訂「後果」
與其我話「再玩就冇得玩！」，不如事前就問佢：「如果你控制唔到時間，你自己認為有什麼後果？」家姐就自己提出：「如果超時，第二日就取消Screen Time！」（呢招 「自己訂規則」 訓練小朋友自控的能力糿對有效！）
✅ 3. 學校長話齋：玩風箏哲學！
「收放自如」 先係最高境界：
- 佢做得好，慢慢 放寬限制（例如週末多30分鐘）
- 失控時就要 收緊，等佢知規矩重要
📣 阿媽真心話
Parental Control 唔係為咗監控，而係幫小朋友 建立健康習慣！記住：我哋嘅目標係有一日可以關閉呢個功能，等佢哋學識自律。
Chinese